كتب : إسماعيل فارس
يحل شريف إكرامي لاعب نادي بيراميدز والأهلي السابق، ضيفًا على الإعلامية بسمة وهبة في برنامجها الذي يحمل اسم "العرافة"، و يذاع عبر قناة المحور الفضائية، ويكشف اللاعب العديد من الكواليس والأسرار في البرنامج.
وفي البرنامج، فاجأته العرافة، قائلة إنه دخل في خناقة كبيرة على كوبري أكتوبر، وحكى تفاصيل الموقف قائلاً: "أنا وأخويا أحمد الله يرحمه كان أكبر مني بـ3 سنين، وكان عندي حوالي 17 سنة وهو 20 وكنا في فرقة واحدة في النادي الأهلي، وفي شهر رمضان كنا راجعين أنا وهو على كوبري أكتوبر وفي السن بتاعنا بتحس أن رجلك شايلاك فبتفتري، فحصل واحنا راجيعين مشكلة واحد كسر علينا فكسرنا عليه بالعربية فكلمة منه وكلمة مننا حصلت خناقة على الكوبري، وأحمد كان عصبيًا وتطورت المشادة الكلامية لتطاول الأيدي والضرب، ومشينا بعد كدا ورحنا النادي تاني يوم فوجئنا أننا اتعملنا محضر في قسم مدينة نصر".
وتابع شريف حديثه، قائلاً: "المهم خدنا كلمتين في النادي وروحنا البيت أبويا عرف فعملنا محاضرة وقال لنا أحنا في شهر رمضان وربنا مدينا صحة ازاى نفتري واليوم ده أخدت على نفسي عهد آخر يوم يحصل بيني وبين أي حد في الشارع احتكاك، والحمد لله من اليوم ده محصلش أي مشكلة تاني".
اقرأ أيضا السعيد وإكرامي ضمن الأفضل في الجولة الخامسة للكونفدرالية
وأكمل:"أبويا أدانا محاضرة واحنا باصين في الأرض، وفوجئنا أن حد من القسم جه ومعاه محضر، أبويا قال هى وصلت لكدة بيجيلي ناس من القسم وعمر ده محصل، فرحت افتح فلقيت المحضر بيسأل على كابتن إكرامي قال معلش احنا محتاجين كابتن اكرامي أصل في سواق عربية نقل عامل فيه محضر عشان ضربه امبارح، فالمحاضرة قلبت بضحك غير طبيعي، وهو قال اه أصله كان قليل الأدب وشتمني".
